ສອງສີລະປິນລາວ ທີ່ ສ.ຝຣັ່ງ-ງານພົບປະ

ສອງສີລະປິນລາວ ທີ່ ສ.ຝຣັ່ງ-ງານພົບປະ 10/06/2019 | 18 h 30 - 20 h 00

ສອງສີລະປິນໜຸ່ມ ສັນຊາດລາວ ທີ່ເຕັມໄປດ້ວຍຄວາມສາມາດ, ຖືກເຊີນໃຫ້ເດີນທາງໄປຮ່ວມງານ ທີ່ ສ. ຝຣັ່ງ ປີ 2019 ນີ້ : ນາງ ນຸດນະພາ ສ້ອຍດາລາ (ນຸດ) ນັກເຕັ້ນ/ນັກອອກແບບການສະແດງ ຈາກ ຟັງລາວ ແລະ ທ່ານ ໄຊສົງຄາມ ອິນດວງຈັນທີ (ຄາມ) ນັກສ້າງຮູບເງົາ.

ນຸດ ຈາກ ຟັງລາວ, ຖືກຄັດເລືອກເຂົ້າຮ່ວມ ໂຄງການແລກປ່ຽນເພື່ອສ້າງການສະແດງ (Résidence de création) ໄລຍະ 3 ເດືອນ ຢູ່ Cité Internationale des Arts ທີ່ ນະຄອນຫຼວງປາຣີ, ດ້ວຍການອຸປະຖໍາທຶນ ຈາກ ສະຖານທູດຝຣັ່ງ ປະຈໍາ ລາວ. ອີກທ່ານໜຶ່ງ, ແມ່ນ ຄາມ, ນັກສ້າງຮູບເງົາ ທີ່ຜົນງານຮູບເງົາເລື່ອງຍາວ ເລື່ອງທໍາອິດ ແລະ ໄດ້ຖືກຄັດເລືອກ ຈາກ ໂຄງການ la Fabrique Cinéma, ທີ່ມີ 10 ນັກສ້າງຮູບເງົາ ຈາກທົ່ວໂລກເຂົ້າມາຮ່ວມ ເພື່ອ ນໍາສະເໜີເນື້ອໃນບົດປະພັນຮູບເງົາ ແລະ ຊອກຫາຜູ່ຮ່ວມຜະລິດຮູບເງົາ.

ສະຖາບັນຝຣັ່ງ ປະຈໍາ ລາວ ມີຄວາມຍິນດີ ເຊີນສີລະປິນທັງສອງທ່ານ ມາບັນຍາຍ ແບ່ງປັນປະສົບການໃນຂະແໜງວິຊາຊີບ, ປະສົບການໃນການເດີນທາງໄປຮ່ວມກິດຈະກໍາທີ່ ສ.ຝຣັ່ງ, ແລະ ວິໄສທັດໃນຕໍ່ໜ້າຂອງທັງສອງຄົນ. ການພົບປະໃນຄັ້ງນີ້ເປັນການໃຫ້ຄວາມສໍາຄັນໃນການຕິດຕາມຜົນງານ ແລະ ເປັນການຊົມເຊີຍຄວາມສາມາດຂອງທັງສອງທ່ານ. ການພົບປະ ຈະດໍາເນີນລາຍການເປັນພາສາລາວ, ພ້ອມການແປເພື່ອຄວາມເຂົ້າໃຈ. ເປັນງານຟຣີ ບໍ່ໄດ້ເສຍຄ່າຜ່ານປະຕູ, ເປີດກ້ວາງສໍາລັບທຸກຄົນທີ່ສົນໃຈເຂົ້າຮ່ວມ, ບໍ່ວ່າຈະເປັນ ມືນັກເຕັ້ນ ຫຼື ນັກສ້າງຮູບເງົາ ສະໝັກຫຼີ້ນ, ຕະຫຼອດຮອດ ຜູ່ສ້າງທີ່ມີແຮງຈູງໃຈໃນການສ້າງສັນຜົນງານ.

ຜົນງານຮູບເງົາເລື່ອງສັ້ນ « Because I am a girl », ຄວາມຍາວ 25ນາທີ ຂອງ ຄາມ ຈະຖືກສາຍໃນງານນີ້.

ວັນຈັນ ທີ 10 ມິຖຸນາ 2019, ເວລາ 18ມ30, ທີ່ ຫ້ອງອະເນກປະສົງ (ໂຮງສາຍຮູບເງົາ) ຂອງ ສະຖາບັນຝຣັ່ງ

ສະຖານທີ່
Institut français du Laos